Sevimli san’atkoringizning konsertidasiz, storis olmoqchisiz — lekin internet rasmni zo‘rg‘a yuklayapti, vaholanki uyda shu telefonning o‘zida hammasi bir zumda ishlaydi. Sababi smartfoningizda yoki “umuman olganda” operatoringizda emas, balki aynan o‘sha joy va vaqtning fizikasidadir.
Operatorlar bunday tadbirlarga qanday tayyorgarlik ko‘radi?
Operatorlar oldindan ma’lum bo‘lgan yirik tadbirlar uchun tarmoqni aniq bir nuqtalarda kuchaytiradi: mobil baza stansiyalarini (COW) ulaydi, yaqin atrofdagi statsionar stansiyalarning quvvatini vaqtincha oshiradi, favqulodda vaziyatlar yuzaga kelgan taqdirda hodisa hududiga qo‘shimcha muhandislarni yo‘naltiradi. Mobiuz ham O‘zbekistondagi yirik konsert va sport tadbirlari uchun ayni shunday ishlarni amalga oshiradi. Masalan, Jennifer Lopesning “Bunyodkor” stadionidagi konserti, “Milliy Fest” va “Mazza Fest by Tehnikum”, shuningdek, Parkent tumanining Zarkent qishlog‘ida o‘tkazilgan “Uzum Sayli” festivallari vaqtida qo‘shimcha mobil baza stansiyalari o‘rnatilgan.
Amalda vaqtinchalik stansiya imkon qadar sahnaga, kirish joylariga va fud-kortga yaqinroq joylashtiriladi — aynan shu yerlarda odamlar ko‘p to‘planadi va shunga mos ravishda tarmoqqa tushadigan yuklama ham eng yuqori bo‘ladi.
Katta maydonlarda COW’larni joylashtirishga oid texnik talablarga ko‘ra, operatorlar o‘zaro xalaqitlar va telefonning sotlar o‘rtasida ortiqcha almashinuviga yo‘l qo‘ymaslik uchun vaqtinchalik stansiyaning chastotasi va quvvatini yaqin atrofdagi doimiy stansiyalar bilan kelishib olishi kerak.
Kutilayotgan yuklamani hisoblashga va ushbu hududda tarmoqni tayyorlashga ulgurishimiz uchun biz yirik tadbirlar haqidagi ma’lumotni oldindan, imkon bo‘lsa, bir necha hafta avval olishga harakat qilamiz.
Agar konsertda aloqa baribir yomonlashsa, bu, katta ehtimol bilan, shaxsan sizning smartfoningizdagi muammo emas, balki minglab telefonlarning bir vaqtda tarmoqqa yuklama berishi oqibatidir. Bunday vaziyatda eng yaxshi chora — kerakli ma’lumotlarni oldindan yuklab olish yoki agar mavjud bo‘lsa, maydonning Wi-Fi tarmog‘iga ulanishdir.