2025-yil 13-iyul kuni «BASTION» Telegram-kanalida Andijon viloyati, Asaka tumani, «Nurafshon» mahallasi hududida aloqa sifati bo‘yicha murojaatga javoban Mobiuz aloqa operatori quyidagilarni ma’lum qiladi.

 Mobiuz aloqa operatori har bir abonentni chuqur qadrlaydi va aloqada bo‘lishi qanchalik muhimligini tushunadi. Aynan shu sababli Asaka tumani «Nurafshon» mahallasida yuzaga kelgan holatga alohida mas’uliyat bilan yondashmoqda.

 «Andijon yog‘-moy» AJga qarashli hududda joylashgan tayanch stansiyasi uzoq yillar davomida ushbu mahallaga xizmat ko‘rsatib kelgan. Hozirda ushbu hudud boshqa yuridik shaxsga o‘tgan hamda uning talabi bilan Mobiuz tayanch stansiyasi olib tashlangan. Biz bu talabni qonunchilik va ijara shartlariga muvofiq bajardik.

 Hozirda mutaxassislarimiz ushbu hududdagi boshqa yer egasi bilan yangi shartnoma tuzish ustida faol ish olib bormoqdalar. Tayanch stansiyasini to‘g‘ri kelgan joyga qo‘yib bo‘lmasligini, bu bo‘yicha tegishli talab va tartiblar borligini hisobga olgan holda kompaniya ishlarni imkon qadar tezlashtirmoqda.

 Shuni tushunish muhimki, bunday vaziyatlarda nafaqat foydalanuvchilar, balki operatorning o‘zi ham zarar ko‘radi. Kompaniyaga bog‘liq bo‘lmagan sabab tufayli sifatli xizmat ko‘rsatish imkoniyati cheklanishi odamlarning ishonchini vaqtincha yo‘qotilishiga hamda operator yetarlicha daromad ololmasligiga olib keladi. Shuning uchun bu masalaning tezroq yechim topishidan kompaniya chin dildan manfaatdor.