"BASTION" Telegram-kanalida Andijon shahrining Bog‘ishamol dahasi bo’yicha e’lon qilingan murojaatga javoban, Mobiuz mobil aloqa operatori quyidagilarni ma’lum qiladi.

Bog‘ishamol - bu ijtimoiy ahamiyatga ega daha bo‘lib, unda shahar hayoti, tepalik relyefi, bog‘ hududi va faol infratuzilma uyg‘unlashgan. Uning umumiy maydoni taxminan 996 gektarni tashkil etib, shundan turar-joy hududlari 45 gektarni egallaydi. Bog‘ishamolning murakkab tepalik relyefi uyali aloqa signallarining tarqalishiga tabiiy to‘siqlar yaratadi.

Buni inobatga olgan holda, Mobiuz aholini zarur aloqa va internet xizmatlari bilan ta’minlash maqsadida uyali aloqa tarmoqlari qamrovini kengaytirish bo‘yicha muntazam ravishda faoliyat olib bormoqda. Kompaniyaning tayanch stansiyalari aholi zich joylashgan dahaning markazida ham, Bog‘ishamolning chekkalarida ham o‘rnatilgan. Shu sababli, katta hududda joylashgan butun dahada internet ishlamayapti, degan iddao haqiqatga to‘g‘ri kelmaydi.

Kompaniyaning texnik mutaxassislari murojaat muallifining internet sifatini tekshirish imkoniyatiga ega bo‘lishi uchun abonentning aniq joylashuvi va aloqa ma’lumotlari zarur. Muallif hamda boshqa abonentlar bunday ma’lumotlarni Telegramdagi Mobiuz onlayn qo‘llab-quvvatlash xizmatiga @mobiuzchatbot orqali yuborishlari mumkin.